Sistemi primar i radarit në aeroportin e Shkupit është jashtë funksionit që nga mbrëmja e së mërkurës për shkak të një defekti teknik, duke detyruar kontrollorët e trafikut ajror të përdorin procedura rezervë dhe të ulin numrin e uljeve, njoftoi kompania shtetërore e navigimit ajror M-NAV, përcjell KDP.“Defekti teknik është i natyrës elektronike dhe nuk ka asnjë ndikim mbi sigurinë e trafikut ajror,” tha Vladimir Risteski, kryetar i Bordit Drejtues të M-NAV dhe drejtor i Departamentit të Navigimit Ajror. Ai shtoi se kompania po bashkëpunon me prodhuesin italian të sistemit për ta riparuar defektin.Derisa të zëvendësohen pjesët e dëmtuara të memories, avionët do të ulen një nga një me intervale më të gjata kohore. Në rast se mbërrijnë disa fluturime në të njëjtën kohë, disa prej tyre do të duhet të qarkullojnë mbi aeroport deri në lejen për ulje.Sistemi i radarit u instalua në vitin 2000 me kosto rreth 2 milionë euro. Një sistem i ri, gjithashtu nga një prodhues italian, u ble për të njëjtën shumë muaj më parë, por ende nuk është vënë në funksion.“Sipas marrëveshjes me sindikatën, pajisjet e reja do të instalohen gjatë dimrit, kur ka më pak fluturime. Është një proces i ndërlikuar që kërkon kohë,” tha Risteski, duke shtuar se furnizuesi italian kishte vonuar dërgesën dhe kishte paguar penalitete.Sindikatat e kontrollorëve të trafikut ajror prej muajsh kanë paralajmëruar për pajisje të vjetruara, duke kërkuar zëvendësim të menjëhershëm. “Të gjitha qendrat kontrolluese në rajon i kanë ndërruar disa herë sistemet, ndërsa ne ende punojmë me atë të vitit 2000,” tha Aleksandar Tasevski, kryetar i Sindikatës Profesionale të Kontrollorëve të Fluturimit.Gjatë verës, kontrollorët paralajmëruan grevë, duke theksuar se jo vetëm radari por edhe softueri dhe pajisjet e tjera janë në kufijtë e funksionalitetit. Greva u shty pas premtimeve të udhëheqjes së re se teknologjia e re do të instalohet së shpejti.Qendra rajonale e kontrollit të fluturimeve në Shkup trajton rreth 150,000 kalime në vit, ndërsa gjatë sezonit veror mbi 600 fluturime në ditë. Sipas Risteskit, siguria nuk është vënë në dyshim pasi kontrollorët marrin sinjale radarike edhe nga Ohri dhe vendet fqinje – Bullgaria, Greqia dhe Serbia.Opozita SDSM akuzoi M-NAV dhe VMRO-DPMNE për “partizim dhe improvizim” në një nga institucionet më të rëndësishme të sigurisë. “Ky nuk është vetëm një defekt teknik, por rezultat i vendosjes së dhunshme të kuadrove partiake. Maqedonia duket e paserioze para botës, ndërsa qytetarët dhe pasagjerët janë të ekspozuar ndaj rrezikut,” tha zëdhënësja e partisë Bogdanka Kuzevska.Ajo shtoi se udhëheqja e re kishte premtuar zëvendësim të plotë të sistemit, por kjo nuk ndodhi. “VMRO-DPMNE e ka kthyer Navigimin Maqedonas në filial partiak. Në vend të profesionalizmit, shohim korrupsion dhe kaos,” tha ajo.Incidenti përbën testin e parë të madh për udhëheqjen e re të M-NAV. Nga aftësia e saj për të zgjidhur shpejt problemin dhe për të përshpejtuar instalimin e sistemit të ri, do të varet nëse do të vihet fundi krizës disavjeçare në këtë institucion kyç.
Burimi:KDP
